Ça fé trò jou apré tempèt-la ki moun dí
Sé shanjé lavi, wé, shanjé lavi pou nimpòt ki
Ki viv dan kòrn ki fé kolé moun dan
Lafoush, Dilak, LaPlas, Sin-Jak, Sin-Janbatis,
Sin-yé p’ap fourni lèktrisité, mé vouzòt – pa bliyé
Lil-Jansharl, Lacombe, Tinjipaö,
Ponchatoula, frèz pouri astè-lá, ça fé alon sorti
Kouri bæk a Chauvin, Montégut, toushé Thibodaux, Houma,
Pasé par Dézalman, prenn bato pi gouvèné koté Baratari – a
Shak Lafitte, tou inondé parèy Braithwaite
Sin-Bærnar, Chalmette, té asé trankil pou tendé bokou shwèt,
Grètna pi Aljé, aou lartis-yé mèt in lavèrtismen
Karavan méné katastròf Ida o fon Meshasébé
Dan Nouvèl-Òléan pou fé pousé vin-dé barj akoté
Katastwòf Karavan kriyé, hélé, kasé nouzòt zoréy-yé
In lavèrtismen proshin prospèk sé porté li élvé
Gonzalès, Donaldson, Acy, Sin-Aman, tou-l-tem
Moun soté yé konm pon, Dékònn-Brilé, Hammond,
Madison, Slidell, partou moun senti sèl
Dan dolo, enho dolo, plènn diven, bòs dolo,
Zozotœr marké déyò sho, limid, sho
Fo no bat, fo no jélé, fo bwa dolo,
Dan nô lit lindistri ap shi – é
Fo pa vini skélèt o manjê obin chwé
Par ça ki p’olé édé fé ézé dodo dan lanwi
Kizinn dan lari, souri enho lafigi
Nouyòrk é Noudjærzé é Pinsilvonni ap rivé isit
Enba in marto mouyé ki sòr Nòrko
Ida halé dolo de Ponchartrain ishka Labé
Fé disab graté Lagrandil é stil
Lapwint-Koupé é Wès Baton-Rouj
Fé li asé fine, mé ça p’olé di yé shapé
Lès Baton-Rouj, gèt, moun dan nòrd toujou bliyé
Senti konm yé gin pou insisté yé moun, itou – pa bliyé
Résours, sharjé sèlfonm, ñamm ñamm, bwason, laglas sivouplé
Kombyin fwa, kombyin jénérasyon gin pou hélé « Pa bliyé ! »
Pa bliyé apré Ida, pa bliyé apré Katrina, apré Laura,
apré Gustav, apré Rita, Delta, Issac, é Zeta
Apré Sin-Toménni, Livingston, ni Sint-Élènn
Shak lokazyon pou édé vou oprésé ènn
Léspri jenti dan liminité san wa
Shak lokazyon vô djòb vini djab
Jonathan J. Mayers
Texte publié dans le 30e numéro Traces. Rencontre Nord-Sud
